موقع المهندس موقع المهندس بيت كل مهندس 
1- تصميم معمارى …. وفى المادة دى هناخذ مشروع أو مشروعين طول السنة والمشروع الأول عادتا بيكون فيلا .. يعنى كل واحد هيصمم فيلا وهيتابع مع المعيد والدكتور اللى عنده فى السكشن بتاعه .. وهيفضل يعدل عليها كتير لحد ما يوصل لأفضل تصميم قبل تسليم المشروع وممكن يلجأ للطلبة الأكبر منه سنا عشان يساعدوه …. ودى أهم مادة عندنا وألذ مادة عندنا … يعنى مش صعبة خاااالص بس بتحتاج وقت وتفكير كتير . …(المادة من300درجة)
2- تصميم معمارى ظل ومنظور….. والمادة دى هنتعلم فيها نرسم القطة فى الثرى دى للمبانى عن طريق تهريب النقط ودى بردو مادة مهمة ولذيذة ولازم نكون متابعين فيها كويس فى المحاضرة والسكشن عشان محدش يوقع و نسلم كل اللوح فى مواعيدها …(المادة من 250 درجة)
3- تصميم معمارى انشاء معمارى …. المادة دى بنتعلم فيها شوية حاجات خاصة بتنفيذ المبانى أو النظام الانشائى بتاع المبنى وبنتعلم نرسم النظام الانشائى دة … ونركز بردو ان احنا نسلم اللوح والأبحاث فى مواعيدها .. عشان دى بتفرق كتير فى الأخر فى الدراجات (المادة من 250 درجة)
4- أسس تصميم …. المادة دى من المواد المهمة وبتتعلموا فيها أسس وقواعد التصميم المعمارى ( واضح من اسمها طبعا ) …. ودى بتفيدكوا جدا فى مادة التصميم المعمارى وعلى فكرة يا جماعة كل المواد عندنا تقريبا مرتبطة ببعضها (المادة من 100 درجة)
5- تصميم معمارى تحليل انشائى ..(structure) …. تحليل انشائى المقصود بيها تحليل القوى اللى بتأثر على المنشأ أو المبنى اللى احنا بنعمله … يعنى هنحسب القوى اللى بتأثر على المبنى بالأرقام (المادة من 100 درجة )
6- الحاسب الألى فى العمارة … وهندرس فى المادة دى برنامج autocad 2d ) وطبعا البرنامج غنى عن التعريف ( المادة من 150 درجة
وده المواد اللى هتدرسوها في الترم الاول
تصميم معمارى …. الترم الأول هتمتحنوا 3 مواد بس اللى هما ( أسس تصميم وتحليل انشائى و حاسب الى ) ودى المواد النظرى .
باقى المواد .. هتكون معانا فى الترم التانى ( ممتدة ) ودى مواد رسم .
نيجى بقى للتلات مواد اللى هيجوا بدلهم فى الترم التانى :-
7- تصميم معمارى المساحة المستوية …. مادة من أسهل ما يمكن … وكلمة المستوية دى يعنى احنا هنا هنتكلم عن المساحة فى بعدين وعلى فكرة فى أنواع تانية للمساحة بس دى مش هندرسها بالتفصيل أو مش هناخد عنهم غير تعريف زى المساحة الجيوديسية أو الطبوغرافية … ( المادة من 100 درجة )
8- تصميم معمارى خواص ومقاومة المواد بندرس فيها مواد البناء والاختبارات اللى لازم تتعمل عليها قبل عملية البناء يعنى حديد و ركام (رمل وزلط) و اسمنت (المادة من 100 درجة)
9- تاريخ العمارة … واضح من اسمها ان احنا بندرس فى المادة دى العمارة على مر العصور وفى أولى بناخد العمارة الفرعونية يعنى قبل الميلاد ( بناة الأهرامات ) وهتتعرفوا على كل المبانى اللى كانت فى عصرهم وفى تانية بندرس العمارة المسيحية وفى تالتة العمارة الاسلامي والمادة دى بتعملوا فيها بحث طول الترم بيتسلم على كذا مرحلة لحد يوم التسليم النهائى ( المادة من 100 درجة )