الزيوت التخليقية و مميزاتها

مميزات الزيوت التخليقية بالنسبة لأنواع الزيوت… ففيه نوعين من الزيوت بشكل أساسي

زيت معدني… وزيت تخليقي

الزيت المعدني Mineral Oil
هو زيت مصدره البترول المستخرج من باطن الأرض (وده سبب تسميته “معدني” لإنه بييجي عن طريق التعدين)
وبيتم تكريره وتنقيته وممكن بيتحط عليه إضافات تحسن من خواصه
الزيت التخليقي Synthetic Oil
هو زيت… تكوينه الكيماوي معدل في المعمل من زيوت لها خواص مختلفة عن الزيت الناتج.. (زي فكرة السمن النباتي.. هو زيت نباتي بس مهدرج وتحول إلى سمن)

مش بالضرورة يكون مصدره الزيت المعدني.. فيه منه نوعين

1- نوع تخليقي 100% من زيوت غير معدنية.. ودي في منها كذا نوع.. بس مش عايز أصعّب الموضوع أكتر من كده
2- نوع نصف تخليقي من زيوت معدنية وزيوت غير معدنية بحيث إن الزيوت المعدنية ماتزيدش عن 30%

مميزات الزيوت التخليقية:

1- سرعة تدفق أعلى من الزيت العادي، فيقدر يزيت الموتور أحسن
2- أداء أحسن في درجات الحرارة العالية قوي والمنخفضة قوي
3- ثبات كيماوي وفيزيائي أفضل (يعني مش بيتحلل أو يفقد لزوجته بسرعة)
4- معدل بخر أقل
5- مضاد للتأكسد والتحلل الحراري وتكون الرواسب، لإنه خالي من الشوائب والمواد الضارة
6- مش محتاج يتغير بسرعة، وده حيوفر في الفلوس ويحافظ على البيئة
7- موفر في الوقود لإنه بيساعد الموتور يتحرك بسهولة أكبر
8- بيحافظ على الموتور لما بندوره الصبح لإنه بيوصل بسرعة للأجزاء اللي ما اتزيتتش
9- عمر أطول للموتور

في اختبارات زيت موبيل 1 على سبيل المثال.. العربية اللي كانوا بيختبروه فيها مشيت حوالي 200 ألف كيلومتر من غير ما الزيت يحصله حاجة

عيوب الزيوت التخليقية

1- لازم يشتغل على مواتير بتستخدم بنزين خالي من الرصاص (كل البنزين 90، 92، 95 في مصر خالي من الرصاص)
2- غير مفضل في المواتير الرحوية أو الدوارة Rotary (ودي نادرة ومش موجودة إلا في المازدا RX-6، RX-7، RX-8)
3- لو العربية اللي حتستخدمه شغالة طول اليوم (زي التاكسيات والميكروباصات)، مش حيبقى فيه فرق محسوس بينه وبين الزيت العادي، لإن ميزة الزيت التخليقي الأساسية هي لما بتيجي تدور الموتور.

السوق فيه أنواع زيوت كتير قوي… اللي بيقعد 5000 كم، واللي يقوللك 10000 كم، واللي يقولك 25000 كم، واحنا كده كده بنغيره على 3000 كم!!!!، ده غير إن كل واحد بسعر، وواحد يقلك خد الزيت ده أنا مجربه، والتاني يقوللك على نفس الزيت كلام تاني…. إيه اللخبطة دي؟؟؟؟؟؟؟؟
ولإن معظمنا مش عارف الفرق ما بين الزيوت ، فإحنا بنعتمد على عمال تغيير الزيوت والمعلومات من الميكانيكية في موضوع تغيير الزيت ده.. وبصراحة مش كل اللي بيقولوه مظبوط لإنه مش مبني على معلومات علمية…

من وجهة نظري.. الزيت التخليقي أحسن بكتير.. وممكن تغير الزيت مع الفلتر مرة واحد في السنة.. مهما كانت عدد الكيلومترات اللي بتمشيها في السنة..

مع إنه أغلى بكتير (يمكن ضعف الزيت العادي) بس كده فعلا يبقى موفر، وبيحافظ على العربية

بس لو عربيتك بتاكل زيت.. انسى الموضوع ده تماما.. لإنك حترمي فلوسك على الأرض